Hnub tim 5-7/02/2010
 Lub neej tshiab hauv tus Tswv Yexus yog li cas? Ntau zaug peb xav hais tias, yog li cas, lo lus uas hais tias, “ Lub neej tshiab” txhais tau hais tias, yeej muaj lub neej qub thiab, yog li ntawd ua cas ho los muaj lub neej tshiab, twb yog lub neej qub tsis zoo txaus, peb thiaj li los nrhiav tau lub neej tshiab lawm. Thaum uas peb los tau lub neej tshiab lawm peb yuav tau ua li cas.
Ua lub neej kom tsim nyog qhov uas peb yog neeg tshiab.
Vajtswv txojlus ntawm Loos 12:1 “Cov kwv tij, Vajtswv hlub peb kawg nkaus li, yog li ntawd kuv thiaj ntuas nej hais tias, thaum nej tseem ua neej nyob no, nej yuav tsum muab nej lub cev fij rau Vajtswv kom dawb huv thiab haum Vajtswv siab. Yog nej ua li ntawd, thiaj yog nej pehawm Vajtswv raws li Vajtswv siab nyiam.”
 Yog li ntawd peb yuav muab dabtsi pub rau Vajtswv, yam uas ciaj sia twb yog peb lub neej ntag, peb yuav tsum ua peb lub neej yog lub neej tshiab hauv tus Tswv Yexus. Thaum peb los txais yuavtus Tswv Yexus lawm peb yuav tsum muaj lub neej tshiab kom phim qhov uas peb los ntseeg tus Tswv Yexus. Thaum peb tseem ua dab tauj dab qhev peb ua lub neej qub. Tiamsis nimno peb los ua lub neej tshiab los muaj tus Tswv Yexus, peb yuav tsum ua lub neej kom tsim nyog qhov uas nws los tuag theej peb lub txhoj.
Tus Tswv Yexus txoj kev tuag saum ntoo khaub lig yog los ris peb lub txim peb yuav tsum tau ua txhua yam kom zoo thiaj phim qhov uas nws los tuag thiab raug kev txomnyem, thaum nws raug kev txomnyem li ntawd twb yog vim peb lub txim ntag. Yog li ntawd peb thiaj yuav tau ua lub neej tshiab hauv tus Tswv Yexus.
 “ Xyoo no muaj cov ntseeg tuaj koom lub rooj sablaj kwvlam 190 leej ua Vajtswv tsuag uas Vajtswv pub peb sawvdaws tau tuaj sib ntsib thiab tau kawm Vajtswv txoj lus ua ke vam hais tias peb yuav coj yam uas kawm mus siv hauv peb lub neej thov Vajtswv foom koob hmoov rau sawvdaws sib ntsib dua lwm xyoo..” |
